Confirmación de campamento

Confirmamos a realización do campamento durante todos os periodos de verán e con todos os servizos adicionais, do 23 de xuño ao 7 de setembro. Aínda estades a tempo de inscribirvos!

O día 14 de xuño ás 16:30 h celebrarase na sala de usos múltiples do cole unha reunión informativa para todos os inscritos no campamento.

CONVOCATORIA ASEMBLEA XERAL ORDINARIA

A ANPA “EMILIA PARDO BAZÁN” convoca a tódolos/as socios/as á ASEMBLEA XERAL ORDINARIA que terá lugar o MARTES 31 de MAIO ás 17:00 horas en primeira convocatoria e ás 17:30 horas en segunda no comedor coa seguinte orde do día:

- LECTURA E APROBACIÓN DA ACTA ANTERIOR

- INFORME ESTADO DE CONTAS

- INFORME DA XUNTA DIRECTIVA

- CALENDARIO DE ACTIVIDADES EXTRAESCOLARES CURSO 22-23

- FESTA DE FIN DE CURSO

- ROGOS E PREGUNTAS

ADAPTACION DA GUÍA DE ACTUACIÓN ANTE A APARICIÓN DE CASOS DA COVID-19 EN CENTROS EDUCATIVOS A UN CONTEXTO DE ALTA CIRCULACIÓN DO VIRUS SARS-CoV-2

 Como algúns de vos xa sabedes dende a Consellería leváronse a cabo recentemente algunhas modificacións con respecto ao protocolo Covid nos centro educativos coa prioridade de manter a presencialidade nos centros, ao observarse que constitúen contornos seguros cunhas tasas de transmisión moi limitadas. A continuación expoñemos os cambios máis significativos:

• Non se confinará a aula como se viña facendo ata o de agora cando apareza un caso positivo, e o alumnado seguirá asistindo á escola normalemente. Dende o centro informaremos de que hai un caso para que extremedes as precaucións (uso máscara, non acudir a espazos multitudinarios, estar prevenidos ante a aparición de sintomatoloxía…) “No caso de alumnado menor de 12 anos, ante a aparición dun primeiro caso nunha aula e ata un total de 4, o alumnado non realizará corentena, independentemente do seu estado vacinal. (a excepción de persoas con inmunodepresión)”. – (Se hai algún mestre ou alumno que poida ser considerado que sufre inmunodepresión deberá comunicarllo ao Equipo Covid do centro adxuntando un certificado médico que o corrobore, para que o teñan en conta á hora de comunicar os contactos estreitos a Sanidade).

• As persoas da Comunidade Educativa que sexan caso confirmado deberán permanecer 7 días en illamento, e pasado e tempo (e sempre que non teñan síntomas durante cando menos os 3 últimos días), poderá incorporarse ao centro, mantendo unha vixilancia activa sobre a aparición de posibles síntomas durante 3 días más, ata cumprir un total de 10 días dende o inicio do illamento.

• A aula será confinada cando aparezan 5 casos ou o 20% de positivos, xa que se considerará un gromo. Esta decisión será pautada pola Central de Seguimento de Contactos en base á información facilitada polo Centro: “Ante agrupacións de casos (20% ou 5 ou máis casos confirmados de infección activa), seguiranse as pautas xerais para a determinación das corentenas dos contactos estreitos. Esta corentena será de 7 días desde o inicio de síntomas do último caso confirmado (sempre que non se desenvolvan síntomas durante este período). Sempre que non haxa síntomas non será necesaria outra proba diagnóstica (PCR ou test)”.

• Cando o contacto dun alumno cun positivo se produce fora da escola (positivo confirmado dalgún familiar co que convive) ao non ter a pauta completa de vacinación o alumno non pode acudir á escola e debe quedarse confinado e seguir as indicacións de Sanidade.

• Para a notificación de casos positivos por proba de antíxenos hai que chamar ao teléfono 881540045 (autotest). Avisar ao equipo covid do centro así como ao centro de saúde para que tramite a baixa. Nin o alumnado, nin o persoal do centro, en ningún caso require de proba complementaria para confirmar o positivo, nin de ningunha proba para reincorporarse ao centro.

Se tedes calquera consulta, non dubidedes en contactar co Equipo Covid.

Grazas!

Felices festas

 

CHOUZO SOBRE XEO

Familias do Chouzo!

Estamos organizando unha xornada de patinaxe sobre xeo na pista de Samil durante a mañá do vindeiro 23 de decembro. Anotádevos ata o 30 de novembro no local da ANPA ou na dirección de correo anpaceipchouzo@gmail.com indicando nome do neno/a, curso e grupo. Uns días despois, confirmaremos polas nosas redes sociais se chegamos ao mínimo de 30 nenos/as anotados para que se poida celebrar a actividade. O prezo final será de 3, 4 ou 5 €, en función do total de nenos/as participantes, e se sae o grupo teriades que pagar por adiantado. Cantos máis sexamos, máis barato será e máis diversión para todos/as!

ANIMÁDEVOS!!

🌰🌰 MAGOSTO 2021 🌰🌰

O venres día 12 de novembro celebrarase o magosto no cole durante o horario lectivo. Como todos os anos, un grupo de mamás e papás voluntarios encargarémonos de picar as castañas a tarde antes e de asalas o día do magosto.
Para poder facer todo isto, necesitamos axuda polo que pedimos VOLUNTARIAS E VOLUNTARIOS para os dous días.
O xoves a partir das 16:00 h estaremos no local pola tarde picando as castañas e preparando todo, e o venres en horario lectivo a partir das 9:00 h da mañá asándoas no cole.
Se queres participar, apúntate antes mandando un correo a: anpaceipchouzo@gmail.com
Entre o luns e o martes chegaravos a circular pedindo castañas a cada neno, unhas 15-20 castañas por neno/a, XA PICADAS, para que llelas leven ás súas titoras, información que irá ampliada por unha circular de dirección.
Grazas e un saúdo!

CARNÉ DE SOCIO

Xa temos os carnés de todas as familias socias da nosa ANPA!

Podedes pasar polo local para recoller o voso a partir das 9:15 h ou polas tardes os mércores e os xoves a partir das 17:15 h. Lembrade que para ter o voso carné, debedes aboar a cota de socio e entregar a ficha cos vosos datos. 

Co carné poderedes beneficiarvos dunha serie de descontos, que atoparedes na sección "Carné de socio" do noso blog. E se coñecedes a algún establecemento interesado en colaborar, non dubidedes en escribir a anpaceipchouzo@gmail.com